„Held reyndar að hvaða sæti sem komið hefði upp úr hattinum kæmi mér að sama skapi lítið á óvart! Erum að koma upp úr 3. deild og erum til alls líklegir, og ekki!" segir Páll en hvert er markmið liðsins?

„Ekkert yfirlýst opinbert Excel markmið hangir uppi frá okkur í Völsungi fyrir þetta sumar eitthvað sérstaklega. Eins og örugglega flest lið í þessari deild þá ætlum við samt klárlega að rembast við að lenda ekki í blóðugri fallbaráttu og reyna að hanga sem lengst í efri hlutanum. Sjáum hvað setur og tökum stöðuna á Víkinni jafnt og þétt."

„Hópurinn telur 28 stráka sem eru frá 15 ára aldri og upp í 36 ára. Jafnvægið er bara í góðum gír, margir ungir og graðir, nokkrir með töluverða reynslu í 1. og 2. deild og svo tveir Pepsi reynsluboltar með nokkur hundruði leikja þar. Flestir í hópnum eru uppaldir Völsungar eða 24 talsins. þrí uppaldir í Þór og einn úr KA. Öfundsverð blanda ekki satt?"

Býst hann við frekari liðsstyrk áður en tímabilið hefst?

„Reiknum ekki með því. Nánast allir áfram frá í fyrra og einu ári eldri ásamt þeim leikmönnum sem hafa bæst í þann föngulega hóp og reiknum með að spila á þeim hópi fram í rauðan," segir Páll sem reiknar með spennandi keppni í 2. deildinni.

„Erfitt að spá en get ekki séð að neitt eða nein lið stingi endilega af svo auðveldlega og hvað þá að eitthvað lið geri endilega töluvert uppá bak! Reiknum við ekki bara með jöfnu og skemmtilegu móti þar sem allt getur gerst og liðin reita af hvort öðru sem engin væri morgundagurinn."