„Það eru ýmsir möguleikar en ekkert í hendi. Við bíðum og sjáum. Við erum klárlega með mjög flotta gæja sem eru að spila núna og við ætlum ekki að taka bara eitthvað. Ef það býðst alvöru maður til að auka breiddina hjá okkur þá stökkvum við kannski á það," segir Sigurbjörn Hreiðarsson, aðstoðarþjálfari Vals.

Sögur eru í gangi um að Valur sé að reyna að fá miðvörðinn Eið Aron Sigurbjörnsson, fyrrum leikmann ÍBV. Eiður er nú hjá Holstein Kiel í þýsku C-deildinni en fær lítið að spila. Hefur Valur áhuga á Eiði?

„Það gæti vel verið, ef hann yrði laus. Hann er hörkuspilari. Það er ekkert klárt í neinu."

Sóknarmaðurinn Patrick Pedersen hefur einnig verið orðaður við Valsmenn en hann var markakóngur þegar hann lék með Hlíðarendaliðinu 2015. Patrick er núna hjá Viking í Noregi þar sem hann hefur verið í hlutverki varamanns.

„Patrick er að spila með Viking og er leikmaður þeirra. Hann hefur ekki verið að byrja að undanförnu og þá byrjar fólk að tengja við Ísland aftur, og þá okkur að sjálfsögðu. Ég veit ekki til þess að það er í einhverjum farvegi. Patrick er einn af betri sóknarmönnum sem hér hafa spilað síðustu ár," segir Sigurbjörn sem viðurkennir að Valsmenn myndu að sjálfsögðu taka honum opnum örmum ef hann væri til í að koma til baka.

Sigurbjörn segir að það sé mjög lítill munur á þeim liðum sem er allstaðar spáð að endi í topp fimm; FH, KR, Breiðabliki, Stjörnunni og Val.

„Þetta ræðst bara á smáatriðum. Við höfum undanfarið spilað við Stjörnuna og FH, það má ekkert á milli sjá þar. KR-ingar eru sterkir og Blikarnir mjög agaðir og þekkja sín hlutverk vel. Þessi lið eru öll í svipuðum pakka og svo er bara spurning hvernig stemningin verður og hvernig þetta spilast, hvernig lið byrja og annað. Svo eru fleiri lið sem maður getur séð stríða þessum liðum."

Það er 100% að við fáum skemmtilegra Íslandsmót en í fyrra.

„Það er alveg garanterað. Það var mikið upprót í fyrra og hugur manna var í Frakklandi meira og minna. Við lékum algjöran toppslag gegn FH í miðri Evrópugleðinni, það var ekki nokkur maður að nenna að mæta. Leikmenn voru jafnvel að pæla í EM. Sá leikur datt milli skips og bryggju. Það gerist ekki í sumar, það er alveg á hreinu," segir Sigurbjörn en viðtalið má sjá í heild í sjónvarpinu hér að ofan.

Ekki gleyma Draumaliðsdeild Eyjabita!
Mundu að gera breytingar á þínu liði í Draumaliðsdeild Eyjabita. Hægt er að skrá sig í allt sumar. Markaðurinn lokar klukkutíma fyrir fyrsta leik umferðarinnar.
Smelltu hér til að taka þátt í Draumaliðsleiknum!