„Mikil læti, örugglega skemmtilegur leikur fyrir áhorfendur, en pirrandi að tapa," sagði Axel Óskar Andrésson, leikmaður KR, eftir tap gegn Breiðabliki í Bestu deildinni.
Lestu um leikinn: KR 2 - 3 Breiðablik
„Það var gaman að spila leikinn, mikið af návígum, skemmtilegur leikur en þrjú mörk (á okkur) á heimavelli er ekki nógu gott. Ég held að allir vissu fyrir leikinn að þetta yrði ekkert 'tiki-taka'."
„Tvö góð lið og seinni leikurinn verður skemmtilegur, ég hlakka mikið til að spila á móti þeim aftur. Það verður aftur hörkuleikur.
Axel talar um læti og hann var svo sannarlega þátttakandi í látunum í lokin þegar hann stóð yfir Patrik Johannesen og lét hann heyra það. Axel fékk gult spjald fyrir vikið.
„Bara ástríða (passion), ástríða í augnablikinu. Svona er bara boltinn og tilfinningar í þessu. Maður væri ekki í þessu ef tilfinningarnar fylgdu ekki."
KR hefur tapað tveimur deildarleikjum í röð. Er eitthvað öðruvísi við þá leiki en fyrstu tvo?
„Nei, þetta er bara ekki búið að vera detta með okkur. Hin liðin hafa verið klár, komu og mættu okkur í baráttunni. Þeir sýndu bara gæði í þessum mörkum sem þeir skoruðu. Við þurfum bara að klára færin okkar, þetta er langt mót."
Jason Daði Svanþórsson skoraði þriðja mark Breiðabliks þegar hann hirti boltann af Guy Smit markverði KR fyrir utan teig.
„Völlurinn býður upp á mistök stundum, allir gera mistök. Þetta verður betra," sagði Axel Óskar.
Athugasemdir