Jordan Henderson, miðjumaður enska landsliðsins og Liverpool, hefur hrósað Marcus Rashford eftir sigur Englendinga á Áströlum í gær.
Rashford var búinn að skora eftir aðeins þrjár mínútur í sínum fyrsta landsleik en hann skoraði einnig í sínum fyrsta leik í Evrópudeildinni sem og Úrvalsdeildinni fyrir Manchester United.
Óttast er að Daniel Sturridge gæti misst af EM sökum meiðsla og aukast þá líkurnar á að Rashford fari með til Frakklands, til muna.
„Þetta er ótrúlegt er það ekki? Svona hefur leiktíðin hans verið. Hann er óttalaus, vill alltaf fá boltann og reynir að hlaupa á bakvið vörnina. Þetta var frábærlega klárað."
„Hann er með allt, hann er góður á boltanum, með góðar hreyfingar og klárar vel. Hann verður að halda áfram að vinna og hann verður stór leikmaður fyrir United og England."
Athugasemdir