Mauricio Pochettino, stjóri Tottenham, aðstoðarmaður hans og yfirnjósnari kíktu á leik Íra og Hollendinga í gær og fylgdust þar með mögulegum skotmörkum fyrir sumarið.
Samkvæmt Sky voru þeir hvað helst að fylgjast með hinum hollenska Vincent Janssen, en hann spilar með AZ Alkmaar í heimalandinu.
Janssen er 21 árs gamall sóknarmaður og var markahæstur í hollensku úrvalsdeildinni á tímabilinu sem var að líða með 27 mörk.
Hann er undir smásjá nokkurra liða í ensku úrvalsdeildinni og þar á meðal eru meistararnir í Leicester og Tottenham.
Pochettino og hans menn sáust í stúkunni og voru þeir mættir til að fylgjast með Janssen. Hann var tekinn af velli þegar korter var eftir af leiknum, en Tottenham er einnig sagt hafa áhuga á Michy Batshuayi, sóknarmanni Marseille og Callum Wilson, sóknarmanni Bournemouth.
Athugasemdir