Lestu um leikinn: Þróttur R. 1 -  0 Víkingur Ó.

„En það er fullt jákvætt. Við náttúrulega skíttöpuðum á móti Selfoss heima síðast þannig að baráttan og viljinn og allt í þessum leik var til fyrirmyndar."

Víkingur Ó. er með eitt stig eftir fyrstu þrjár umferðir Íslandsmótsins og hefur enn ekki náð að skora mark. Það er áhyggjuefni fyrir þjálfarann en liðið saknar helsta markaskorara síns sem gæti misst af tímabilinu vegna meiðsla.

„Maður hefur alltaf áhyggjur þegar maður nær ekki að skora. Maður vinnur ekki fótboltaleiki nema skora. Við lendum náttúrulega í því núna að senterinn okkar sem við fengum fyrir tímabilið, hún Samira. Hún er búin að vera hjá okkur síðustu ár og hún er meidd og óvíst með hennar þátttöku í sumar. Við erum í dálítið vondum málum þar. En við sköpuðum okkur færi í dag til að skora. Við þurfum bara að finna nýjar leiðir til að skora í raun og veru," sagði Björn Sólmar og var í kjölfarið spurður út í sóknarmanninn sem hann stillti fram í dag en Unnbjörg Jóna Ómarsdóttir spilaði lengi stöðu markvarðar en ákvað fyrir nokkrum árum að reyna fyrir sér sem útileikmaður.

„Hún ætti nú að vita hvernig á að skora hjá markmönnum. Unnbjörg var náttúrulega einu sinni markmaður en er búin að spila sem útileikmaður í nokkur ár. Hún er úti háskóla og við fengum hana bara. Það er rosa mikil ógn af henni og vonandi fer hún bara að setj'ann."

Næsti leikur Víkinga Ó. er gegn toppliði HK/Víkings á útivelli. Björn Sólmar býst við að nálgast þann leik á svipaðan hátt og leikinn í dag.

„Við nálgumst þann leik svipað og þennan leik. Þrótturum var spáð fyrir ofan okkur. Flestum liðum var náttúrulega spáð fyrir ofan okkur en HK/Víkingur eru með Pepsi-deildarlið. Þær eru svakalega sterkar. Þær eru búnar að reyna að komast upp úr þessari 1. deild í mörg, mörg ár. Alltaf með sama liðið og alltaf klikkar eitthvað hjá þeim. En þær eru rosalega góðar. Þannig að eins og í dag verðum við að byggja á sterkum varnarleik og reyna að nýta skyndisóknir."