Freyr Alexandersson, þjálfari Leiknis, var hundsvekktur eftir 1-0 tap sinna manna gegn KR í Pepsi-deildinni í kvöld. Freyr vill meina að sínir menn hefðu átt meira skilið úr leiknum.
Lestu um leikinn: KR 1 - 0 Leiknir R.
„Mér fannst við eiga skilið að fá meira. Það var lítið sem skildi liðin að, satt best að segja viðbjóðslega lítið. Ég er mjög ánægður með strákana, við lögðum allt í þetta og komum þeim í tóm vandræði. Þeir voru byrjaðir að tuða og grenja eftir 30 sekúndur og þannig náðum við að stjórna fyrri hálfleiknum algerlega," sagði Freyr eftir leikinn.
„Þeir voru betri í 20 mínútur í seinni hálfleik og svo fáum við á okkur viðbjóðslegt mark."
Freyr er á því að Eyjólfur Tómasson, markvörður Leiknis, hefði átt að gera betur í sigurmarki KR:
„Eyjólfur var góður í leiknum og er búinn að eiga frábært sumar. Svo gerir hann bara mistök og þeir skora. Þetta eru engir smá kallar í þessu KR liði, ef þeir geta ekki skorað úr þessu, þá eru þeir í vandræðum. Þannig maður er drulluóánægður með markvörsluna í þessu fasta leikatriði."
Eyjólfur lét síðan reka sig út af í uppbótartíma eftir algeran klaufaskap.
„Hann missti sennilega einbeitningu og við erum mjög svekktir með þetta. En við breytum þessu ekki úr þessu."
Athugasemdir