Önnur umferð La Liga hófst í kvöld þegar Villarreal fékk Espanyol í heimsókn.

Felipe Caicedo kom gestunum yfir í upphafi leiks en eftir rúmlega klukkutíma leik jafnaði Roberto Soldado metin.

Annað mark Soldado í jafnmörgum leikjum en hann gekk nýverið í raðir Villarreal frá Tottenham þar sem hann náði aldrei að sýna sitt rétta andlit.

Annar nýr framherji, Cedric Bakambu, reyndist svo hetja heimamanna þegar hann skoraði tvö mörk á lokamínútum leiksins og tryggði Villarreal sinn fyrsta sigur.

Espanyol vann í fyrstu umferð á meðan Villarreal gerði jafntefli og hafa því bæði lið fjögur stig eftir tvo leiki.