Skúli Jón Friðgeirsson talaði opinskátt um rauða spjaldið sem hann fékk gegn Val fyrr í kvöld.
Skúli telur Guðmund Ársæl Guðmundsson, dómara leiksins, hafa rekið sig óvart af velli.
Skúli telur Guðmund Ársæl Guðmundsson, dómara leiksins, hafa rekið sig óvart af velli.
Lestu um leikinn: Valur 2 - 0 KR
„Gunni og Kristinn Freyr eru að berjast um boltann og mér fannst Kristinn vera að toga í Gunna, þannig ég fer að Guðmundi Ársæli og segi: 'Hann má ekki toga í hann þótt hann sé í sókn.' Punktur," sagði Skúli sársvekktur að leikslokum.
„Fyrir það fékk ég gult spjald og ég er nokkuð viss um að Guðmundur vissi ekki að ég væri á gulu spjaldi því hann gefur mér það einhvern veginn á hlið og labbar svo í burtu. Þá koma Valsmennirnir og benda honum á að ég sé á gulu spjaldi og þá verður hann náttúrulega að reka mig útaf.
„Frekar grátlegt að það þurfi ekki meira til. Miðað við það sem var sagt fyrr í leiknum og seinna í leiknum þá er alveg ótrúlegt að ég hafi fengið gult spjald fyrir þetta."
Tíu mínútum síðar dæmdi Guðmundur ansi umdeilda vítaspyrnu og segist Skúli ekki skilja neitt í þeim dóm heldur.
„Ég sá þessa vítaspyrnu líka og ég skildi ekki heldur hvað var að gerast þar. Guðmundur var eitthvað illa upplagður í dag, ég held það hafi allir séð það."
Athugasemdir