Á dögunum var fánastöng reist við Lindakirkju í minningu Gunnars Steins Guðlaugssonar sem fermdist í Lindakirkju vorið 2014. Gefandi stangarinnar er Arsenal-klúbburinn á Íslandi, sem Gunnar Steinn var félagi í.
Klúbburinn gaf jafnframt gjöf til SKB Styrktarfélags krabbameinssjúkra barna.
Á myndunum hér að neðan má sjá fjölskyldu Gunnars Steins, fulltrúa Lindasóknar og Sigurð Hilmar Guðjónsson varaformann Arsenalsklúbbsins við vígslu stangarinnar. Þá er mynd af Gunnari Steini og systur hans Evu sem tekin var fyrir nokkrum árum og mynd af Gunnari á Emirates leikvanginum þangað sem Arsenal-klúbburinn bauð honum.
Fjölskylda Gunnars Steins lýsir honum með eftirfarandi orðum:
„Gunnar Steinn var mikill áhugamaður um flug og átti þann draum að verða flugmaður. Áhugamál hans voru ferðalög, sérstaklega erlendis og hafði hann komið víða við. Gunnar var mikill dýravinur og hafði mikinn áhuga á íþróttum. Gunnar stundaði knattspyrnu, körfubolta, skíði og golf.
Við minnumst Gunnars fyrir hans jafnaðargeð, hann var hæglátur, auðmjúkur, spekingur og einstaklega hjartahreinn og góður drengur. Hans er sárt saknað."
Athugasemdir
