Nú er 2. umferð riðlakeppni Meistaradeildar Evrópu lokið. Það voru átta leikir sem fram fóru í kvöld og þar voru nokkur úrslit sem komu mönnum á óvart.

Theo Walcott hefur verið að finna sig á þessu tímabili og hann setti bæði mörk Arsenal í 2-0 sigri gegn Birki Bjarnasyni og félögum í Basel frá Sviss. Birkir spilaði 79 mínútur, en það var athyglisvert að sjá Xhaka-bræðurna, þá Granit og Taluant kljást í annað skipti á stuttum tíma.

Franska stórliðið Paris Saint-Germain vann Ludogorets með þremur mörkum gegn engu í sama riðli og því eru Arsenal og PSG bæði með fjögur stig eftir þessa tvo leiki sem eru búnir.

Barcelona lenti í kröppum dansi gegn Borussia Mönchengladbach í Þýskalandi þar sem Thorgan Hazard kom heimamönnum yfir á 34. mínútu. Börsungar komu hinsvegar til baka í seinni hálfleiknum, en það voru Arda Turan og Gerard Pique sem skoruðu mörkin í 2-1 sigri Barcelona í þessum leik.

Pep Guardiola og hans menn í Manchester City leika í sama riðli og Barcelona, en þeir heimsóttu Celtic í kvöld. Flestir bjuggust við þægilegum sigri City-manna, en svo varð ekki. Celtic komst þrisvar yfir í leiknum, en það var hins vegar ekki nóg þar sem City kom alltaf til baka og að lokum fór svo að liðin skildu jöfn, 3-3 á Celtic Park í Glasgow.

Að lokum ber svo að nefna það að Yannick Ferreira-Carrasco tryggði Atletico Madrid heimasigur gegn Bayern München, en þetta var fyrsta tap Carlo Ancelotti með Bayern í alvöru fótboltaleik.

Besiktas gerði jafntefli við Dynamo Kiev og sömu sögu má segja af Rostov og PSV og þá vann Napoli á heimavelli gegn Benfica. Napoli komst í 4-0, en Benfica náði að minnka það niður og lokatölur 4-2 á Ítalíu.