Þessi skrautlegi umboðsmaður sinnir mörgum af helstu stjörnum evrópska fótboltans og nægir að nefna Paul Pogba og Zlatan Ibrahimovic.

Raiola virðist líka hafa mikla ástríðu fyrir listinni en hann líkti Pogba við frægt málverk á dögunum.

Hann fer einnig inn á svið listarinnar þegar hann er beðinn um að lýsa nýjasta skjólstæðingi sínum, undrabarninu Gianluigi Donnarumma.

„Ég myndi bera hann saman við listaverk Modigliani. Hann er 170 milljón evra virði. Hann á mjög bjarta framtíð".

„Hann er yfirnáttúrulegt undrabarn og það elska hann allir. Hann getur nú þegar litið á sig sem meistara en hann á eftir að verða stórmeistari". segir Raiola.

Hinn 16 ára gamli Donnarumma virðist vera búinn að vinna sér inn fast sæti á milli stanganna hjá AC Milan en hann hefur þótt standa sig vel síðan hann kom inn í liðið á dögunum.