„Hermann Hreiðarsson er góður vinur minn. Við spiluðum saman hjá Portsmouth. Ég hef viljað koma hingað í 4-5 ár og ég náði loksins að koma núna. Ég hef notið tímans hér," sagði Marc við Fótbolta.net í dag.

„Við höfum farið í útsýnisferðir og við fórum til Vestmannaeyjar sem eru mjög fallegar. Ég er hissa á að ég hafi aldrei komið hingað áður, ég reikna með að koma aftur síðar."

Í golfi og veiði
Hermann og Marc kíktu til Vestmannaeyja í gær þar sem þeir æfðu með ÍBV. Marc þarf að halda sér í formi fyrir landsleiki með Írum gegn Englendingum og Skotum. Þeir félagar hafa einnig farið í golf og að veiða á Íslandi.

„Golfvellirnir eru góðir og það er gaman að veiða. Veiði er mitt helsta áhugamál fyrir utan fótboltann og það er nóg af stöðum til að veiða hér," sagði Marc en hvor er betri í golfinu, hann eða Hermann?

„Klárlega ég," sagði Marc léttur í bragði. „Stóri maðurinn er ekki slæmur. Hann hefur æft sig síðan að við mættum síðast og þetta er hörku einvígi hjá okkur."

Hrósar Hermanni í hástert
Marc spilaði með Hermanni hjá Portsmouth frá 2007 til 2010 og þeir urðu meðal annars bikarmeistarar með liðinu árið 2008.

„Hann var stórkostlegur leikmaður og hann átti stórkostlegan feril. Við náðum að smella saman frá fyrsta degi. Hann hefur verið góður vinur minn undanfarin ár og hann hjálpaði mér mikið þegar ég var ungur hjá Portsmouth."

„Ég á margar sögur af honum en ég ætla að halda þeim fyrir sjálfan mig," sagði Marc og hló. „Hann er frábær persóna og ég gæti ekki talað betur um hann. Síðan ég kom til Íslands hefur hann látið mig líða eins og ég sé heima hjá mér."

Hér að ofan má sjá viðtalið í heild sinni en flugur gerðu Marc lífið leitt á meðan á því stóð!