Þjálfari Evrópumeistara Real Madrid, Zinedine Zidane segir það jafn mikið afrek að vinna Meistaradeildina eins og það var að verða Heimsmeistari.
Real vann sinn 11. Evróputitil með sigri á grönnum sínum í Atletico en vítaspyrnukeppni þurfti til að knýja fram úrslit. Cristiano Ronaldo skoraði sigurmarkið úr sinni spyrnu en leikurinn endaði 1-1 í venjulegum leiktíma og eftir framlengingu.
Zidane tók við liðinu í janúar en hann hefur nú unnið Meistaradeildina sem leikmaður og þjálfari.
„Að verða Evrópumeistari er eins gott og að verða Heimsmeistari," sagði Frakkinn sem varð heimsmeistari með landi sínu árið 1998 á heimavelli.
„Eftir alla vinnuna sem við lögðum í þetta, er ég mjög stoltur. Við gerðum þetta frábærlega. Ég er ánægður með að hafa verið partur af þessu frábæra liði í langan tíma."
„Þegar þú ert með leikmenn eins og við þá muntu afreka hluti eins og við gerðum í kvöld."
Athugasemdir