„Gríðarlega sáttur. Þetta var bara nauðsynlegt fyrir okkur að ná í þrjú stig hér í dag og halda í við þau lið sem eru fyrir ofan okkur og reyna að nálgast þau, missa þau ekki frá okkur. Þannig að þetta var gríðarlega mikilvægur sigur í dag og ég er gríðarlega sáttur við strákana." sagði Gunnar Guðmundsson, þjálfari Gróttu, eftir 1-0 sigur á Grindavík í kvöld.
Lestu um leikinn: Grótta 1 - 0 Grindavík
Grindavík var meira með boltann og voru í raun óheppnir að ná ekki forystunni í fyrri hálfleiknum. Í síðari hálfleik voru Gróttumenn hins vegar gríðarlega þéttir og fátt um færi fyrir Grindavík.
„Já, ég er sammála því. Það voru þarna nokkur atvik í fyrri hálfleiknum þar sem þeir fengu virkilega opin færi og við vorum heppnir þá að fá ekki jöfnunarmark á okkur. En svo náðum við að loka betur á þá í síðari hálfleiknum og þetta var meira svona klaps eða hálffæri, fyrir utan kannski í lokin þar sem Árni varði mjög vel."
Mark Gróttu í dag var einungis þeirra fimmta í sumar en þrátt fyrir það hafa þeir unnið þrjá leiki. Gunnar var spurður út í markaþurrðina.
„Alveg hárrétt, við erum búnir að skora lítið af mörkum en við höfum verið að verjast nokkuð vel. Það hefur vantað aðeins upp á hjá okkur að koma boltanum yfir línuna. Við erum líka að fá inn menn núna sem bæta aðeins sóknarleikinn hjá okkur. Viktor (Segatta) var að koma inn núna og Atli (Ottesen) kom inn í þessum leik þannig að við vorum strax orðnir miklu beittari í þessum leik en við höfum verið áður og það gefur okkur bara gott líf. Ef við höldum áfram að vera þéttir og nýtum hraðan betur eigum við eflaust eftir að ná í fleiri stig."
Viðtalið má sjá í heild sinni að ofan.
Athugasemdir