Það er orðið endanlega staðfest að BÍ/Bolungarvík er fallið niður í 2. deild. Liðið tapaði fyrir Fram í dag. Jón Hálfdán Pétursson kallaði eftir bættri aðstöðu fyrir fótboltann fyrir vestan í viðtali við Fótbolta.net eftir leikinn.
Lestu um leikinn: Fram 3 - 1 BÍ/Bolungarvík
Hann var spurður að því hver væri stærsta ástæðan fyrir því að Djúpmenn séu fallnir?
„Þunnur leikmannahópur fyrri hlutann og sóknarleikurinn var ekki nægilega beittur í byrjun. Er það ekki síðan bara þjálfarinn sem ber ábyrgð? Ég er nýr í þessu starfi og ég tek ábyrgðina. Gerum við ekki allir mistök? Dómararnir gera mistök, leikmenn gera mistök. Ég gerði fullt af mistökum," sagði Jón Hálfdán.
Það er stór gjá milli 1. og 2. deildar, hvernig telur hann framtíð liðsins vera?
„Það sem við þurfum að horfa í núna er aðstöðumunurinn. Við verðum að fá betri aðstöðu yfir vetrartímann. Ég tel að annars getum við ekki haldið í við þetta Stór-höfuðborgarsvæði og allt það. Við erum að æfa á parketi viku fyrir fyrsta leik."
Jón Hálfdán segir að erfitt sé að halda metnaðarfullum ungum leikmönnum við þessar aðstæður. Viðtalið má sjá í spilaranum hér að ofan.
Athugasemdir