Ítalski sóknarmaðurinn Giuseppe Rossi hefur verið lánaður til spænska úrvalsdeildarliðsins Celta Vigo frá ítalska úrvalsdeildarliðinu Fiorentina.
Rossi eyddi síðustu leiktíð einnig á láni á Spáni en þá hjá Levante sem hafnaði í neðsta sæti La Liga. Þrátt fyrir það tókst Rossi að skora sex mörk í sautján leikjum.
Þessi 29 ára gamli framherji hefur átt í mikum vandræðum með meiðsli í gegnum ferilinn en hann á 30 landsleiki fyrir ítalska A-landsliðið.
Celta Vigo var spútniklið La Liga á síðustu leiktíð og endaði í sjötta sæti en liðið missti besta leikmann sinn til Man City í sumar þegar Nolito færði sig um set.
Athugasemdir