Mario Balotelli náði að skora fyrir Liverpool í deildabikarnum í gær en byrjun hans í búningi Rauða hersins hefur verið langt frá væntingum. Daniel Storey hjá football365.com gerði tilraun til að reyna að láta Balotelli líða betur með því að taka saman lista yfir leikmenn sem byrjuðu hægt en náðu sér síðan á beinu brautina.
10) Edin Dzeko (Manchester City) - Raðaði inn mörkum fyrir Wolfsburg áður en hann kom til City. Hann skoraði aðeins tvö mörk í fyrstu 15 leikjunum en var svo mikilvægur þegar City vann titilinn 2011/12.
9) Jurgen Klinsmann (Tottenham Hotspur) - Klinsmann átti endurkomu til Spurs 33 ára og var frammistaða hans vonbrigði til að byrja með. Hann lauk tímabilinu með átta mörkum í níu síðustu deildarleikjunum.
8) Teddy Sheringham (Manchester United) - Náði sér ekki á strik fyrsta tímabil sitt hjá United en svo lá leiðin upp á við. Hann skoraði í úrslitaleik Meistaradeildarinnar og hans besta tímabil var svo hans fjórða tímabil hjá United. 34 ára byrjaði hann 29 deildarleiki og var markahæstur leikmanna United.
7) James Beattie (Southampton) - Ef sóknarmaður getur spilað 27 leiki í röð án þess að skora mark en spilað fyrir enska landsliðið þremur árum síðar getur Balotelli svo sannarlega slegið í gegn á Anfield.
6) Juan Pablo Angel (Aston Villa) - Keyptur á háar fjárhæðir til Villa 2001 en náði sér ekki á strik og komst stundum ekki á bekkinn. Ofan á allt fékk hann heimþrá. Þegar David O'Leary tók við stjórnartaumunum byrjaði Kólumbíumaðurinn að skora og komst á beinu brautina.
5) Peter Crouch (Liverpool) - Var aðhlátursefni þegar hann hafði ekki skorað í fyrstu 18 leikjum sínum fyrir Liverpool. Þegar hann yfirgaf félagið átti hann 42 mörk fyrir það.
4) Didier Drogba (Chelsea) - Einn besti leikmaður í sögu Chelsea en komst til að byrja með í fréttirnar fyrir sífelld meiðsli og dýfur.
3) Thierry Henry (Arsenal) - Það vita allir að Henry breyttist úr kantmanni í sóknarmann hjá Arsenal en hann átti í erfiðleikum með markaskorun til að byrja með. Svo fóru flóðgáttir að opnast.
2) Andy Cole (Manchester United) - Munaði litlu að hann yrði flopp hjá United. Þurfti fjölmargar tilraunir til að ná inn marki til að byrja með en þegar Eric Cantona hætti steig Cole upp i aðalhlutverkið.
1) Dennis Bergkamp (Arsenal) - Var gagnrýndur eftir fyrstu leikina með Arsenal og margir töluðu um köttinn í sekknum. Síðar komu þrír Englandsmeistaratitlar, tveir FA-bikartitlar, tvö mörk tímabilsins og stytta fyrir utan Emirates leikvanginn.
Athugasemdir
