Kjartan Henry Finnbogason skoraði sitt áttunda mark á tímabilinu þegar Horsens tók á móti Næstved í dönsku 1. deildinni í dag.

Kjartan Henry kom Horsens yfir með marki á markamínútunni miklu. 43. mínútu og var staðan 1-0 í hálfleik fyrir Horsens.

Í seinni hálfleik hrundi hins vegar allt á skömmum tíma fyrir Horsens, en Næstved setti þrjú mörk með sex mínútna millibili um miðjan seinni hálfleikinn.

Lokaniðurstaðan því 3-1 fyrir Næstved, en þetta eru mikil vonbrigðarúrslit fyrir Horsens, sem er með 31 stig í þriðja sæti deildarinnar eftir tapið.