„Spennan hefur verið að byggjast upp síðustu vikur, bæði hjá leikmönnum og fólkinu kringum félagið. Breiðholtið er spennt," segir sóknarmaðurinn Ólafur Hrannar Kristjánsson, fyrirliði Leiknis. Breiðholtsliðið er að fara að leika í efstu deild í fyrsta sinn í sögunni og mætir Val á Hlíðarenda í fyrstu umferð á sunnudagskvöld.
„Þjálfararnir eru búnir að undirbúa leikmenn vel fyrir þetta og láta vita af því hvers er að vænta. Þetta umfang er miklu stærra og meira en verið hefur í 1. deildinni. Leikmenn eru tilbúnir í þetta."
Leikni er spáð neðsta sæti. Ólafur segir leikmenn tilbúna að taka meiri gagnrýni og aukinni umfjöllun sem fylgir því að spila í Pepsi-deildinni.
„Menn verða að vera með breitt bak ef þeir ætla að spila í þessari deild. Það er miklu erfiðara að takast á við þetta ef menn geta ekki tekið gagnrýni."
„Ég held að þetta verði hörkuleikur á sunnudaginn. Við förum í alla leiki til að ná í eins góð úrslit og við getum. Valsmenn ætla eflaust að slátra nýliðunum á heimavelli í fyrsta leik."
Viðtalið má sjá í heild sinni í spilaranum hér að ofan.
Athugasemdir