Arsenal er enskur bikarmeistari annað árið í röð eftir 4-0 sigur á Aston Villa á Wembley í dag.

Sigur Arsenal var mjög sannfærandi eins og tölurnar gefa til kynna. Theo Walcott byrjaði frammi á kostnað Olivier Giroud og hann stimplaði sig inn með marki fyrir leikhlé.

Alexis Sanchez skoraði annað markið með ótrúlegu þrumuskoti í upphafi síðari hálfleiks og Per Mertesacker skoraði þriðja markið með skalla eftir horn.

Á lokasekúndunum setti varamaðurinn Giroud síðan síðasta naglann í kistuna hjá Aston Villa.

Þetta er stærsti sigurinn í úrslitaleik enska bikarsins síðan Manchester United sigraði Chelsea 4-0 í úrslitum árið 1994.

Úrslitin þýða líka að ekkert lið hefur unnið bikarinn jafn oft og Arsenal. Þetta var tólfti bikarmeistaratitill Arsenal en Manchester United er í öðru sæti með ellefu slíka titla.