„Ég var mjög sáttur við baráttuna í dag og það var allt annað að sjá okkur heldur en gegn Grindavík," sagði Gunnar Guðmundsson þjálfari Gróttu eftir 1-0 tap gegn KA í 1. deildinni í dag.
Lestu um leikinn: Grótta 0 - 1 KA
„Ég var ánægður með hvernig við vörðumst og börðumst. Við nýttum fyrri hálfleikinn hins vegar ekki nógu vel þegar við vorum með vindinn í bakið. Okkur tókst ekki að skapa okkur nógu góð færi og það skildi á milli."
Grótta hefur ekki náð að skora mark í fyrstu fjórum umferðunum í 1. deildinni en Gunnar hefur þó ekki þungar áhyggjur.
„Við erum ekkert að fara á límingunum út af þessu. Við vissum að sumarið yrði erfitt. Við erum búnir að eiga nokkuð erfið lið í brjun móts og við höfum staðið vel í þeim öllum. Ég er sannfærður um að eftir því sem líður á þá náum við betri tökum á því sem við erum að gera, setjum mörk og vinnum leiki."
Athygli vakti að enginn uppalinn leikmaður Gróttu kom við sögu í dag en það ku vera í fyrsta skipti sem það gerist í sögu félagsins.
„Fyrir hvern einasta leik stillum við upp okkar sterkasta liði og við gerðum það í dag. Þannig er það bara, stundum eru uppaldir leikmenn og stundum ekki."
Hér að ofan má sjá viðtalið í heild sinni.
Athugasemdir