Águst Eðvald Hlynsson skrifaði í dag undir þriggja ára samning við Breiðablik. Ágúst er í U17 ára landsliði Íslands en hann skoraði með meistaraflokki Blika gegn Kríu í Borgunarbikarnum í síðustu viku.
„Ég er mjög ánægður með að þetta sé frágengið og klappað og klárt," sagði Ágúst við Fótbolta.net eftir undirskriftina í dag.
Ágúst hefur oft farið erlendis á reynslu og mörg félög utan landsteinana hafa sýnt honum áhuga. Hann stefnir á að fara út í atvinnumennsku síðar meir.
„Hugurinn stefnir út en hvenær það verður kemur í ljós. Hvort það verði í sumar eða seinna."
Hinn sextán ára gamli Ágúst varð í síðustu viku yngsti markaskorari meistaraflokks Breiðabliks frá upphafi en Arnar Grétarsson, þjálfari liðsins, átti fyrra metið.
„Hann grínaðist með það eftir á að hann hefði ekki látið mig spila ef hann hefði vitað af þessu meti. Hann er samt örugglega stoltur af mér," sagði Ágúst.
Hér að ofan má sjá viðtalið við Ágúst í heild.
Athugasemdir