Ingólfur Sigurðsson, leikmaður Fram:
Nei, ég get ekki sagt það. Fyrir mót velti maður því fyrir sér hvort þjálfararnir hafi ætlað sér að gera breytingar á byrjunarliðinu á milli leikja. Það hefur þó ekki enn gerst.
Í fyrstu leikjunum var Ísland töluvert gagnrýnt fyrir að vera lítið með boltann og margir íslenskir stuðningsmenn furðuðu sig á því. Það er ekki nýtilkomið í leik íslenska liðsins að vera minna með boltann en andstæðingurinn. Í undankeppninni var enga tölfræði að sjá á sjónvarpsskjánum og því var fólk ekkert að spá í því.
Mér fannst vandamálið einna helst vera að liðið nýtti boltann ekki nógu vel og náði því færri góðum sóknum. Það hefur orðið betra eftir því sem hefur liðið á mótið.

Magnús Halldórsson, blaðamaður á Kjarnanum:
Ég er mikil stuðningsmaður landsliðsins, við feðgar fórum á alla heimaleiki Íslands á Laugardalsvelli í sex ár, þangað til við fluttum til Bandaríkjanna í fyrra. Það síðasta sem við gerðum á landinu var að labba af Rauðalæknum niður á völl og sjá sigurleikinn gegn Tékkum. Skemmtileg minning.
Geta liðsins hefur ekki komið mér á óvart, því íslenska liðið er ógnarsterkt, þegar það á sinn besta dag. Það er örugglega ægilega erfitt að spila á móti svona baráttuglöðu liði, sem getur líka sótt vel, þegar þannig liggur á því, eins og sást í öðru marki Íslands gegn Englandi.

Sindri Sverrisson, blaðamaður á Morgunblaðinu:
Það hljómar kannski hrokafullt, þegar liðið er komið í 8-liða úrslit, en það hefur nákvæmlega ekkert við leik Íslands komið mér á óvart eða fengið mig til að hugsa: „Ha? Getum við þetta?“ Þegar ég horfði á leikinn við England fannst mér stundum að ég væri að horfa á einhvers konar endursýningu. Það sem hefur kannski helst komið mér á óvart er hve leikmenn hafa enst vel. Menn eins og Kolbeinn og Aron Einar voru mikil spurningamerki fyrir mót vegna skorts á leikformi, en svo er Aron mættur fremstur í skyndisókn að fíflast í Jack Wilshere eftir 80 mínútna leik, í fjórða leiknum á 13 dögum! Þá vissi maður ekki alveg við hverju var að búast af Kára Árnasyni, sem hefur verið stórkostlegur. En það hvernig liðið hefur spilað, leikmenn unnið sína vinnu og haldið skipulagi, og alltaf náð að skapa sér færi, hefur ekkert komið á óvart.

Stefán Árni Pálsson, fréttamaður á Vísi:
Það sem hefur komið mér mest á óvart er hversu miklu máli varamenn liðsins skipta. Þeir koma alltaf inn á og hafa í öllum tilfellum haft jákvæð áhrif á liðið. Það að Ísland sé komið í 8-liða úrslit kemur mér ekkert á óvart, þessir gaurar eru löngu hættir að koma mér á óvart.

Þórður Helgi Þórðarson, Doddi litli á Rás 2:
Úrslitin

Björn Berg Gunnarsson, sparkspekingur og starfsmaður Íslandsbanka:
Þrátt fyrir erfiða andstæðinga í undankeppninni gátum við nýtt Ara Frey, Jóhann Berg, Gylfa og Birki Bjarna vel sóknarlega. Það hefur minna farið fyrir þeim á mótinu og ríkari áhersla en áður á langa bolta. En árangurinn talar sínu máli og því ekki hægt að kvarta!

Davíð Snorri Jónasson, þjálfari hjá Stjörnunni:
Leikkerfi og hvernig við nýtum styrkleika okkar hefur ekkert breyst. Hins vegar fannst mér gaman að sjá hvernig við þorðum að bæta leik okkar sóknarlega frá Ungverja leiknum. Við þurftum að vera klárari með boltann gegn Austurríki og við gerðum það. Það sama má í raun segja með pressuna að við þorum að færa okkur ofar á völlinn á réttum momentum og eftir andstæðingum. Greinilega vinna sem hefur átt sér stað á æfingasvæðinu. Við erum töffarar.

Gunnlaugur Jónsson, þjálfari ÍA:
Ég veit ekki hvað skal segja - maður dreymdi um gott mót en þetta er orðið miklu meira en maður þorði að vona. Það kemur manni kannski í opna skjöldu hvað liðið virðist stíga enn meira upp eftir því sem sviðið verður stærra - það er enginn smá eiginleiki hjá þessu liði. Teymið hefur unnið heimavinnuna vel og undirbúið liðið stórkostlega - lærdómurinn sem við tökum úr þessu móti er eitthvað sem mun koma okkar þjóðfélagi og að sjálfsögðu íslenskri knattspyrnu til góða næstu árin.

Björgvin Páll Gústavsson, landsliðsmaður í handbolta:
Já hvað þessir gæjar eru miklir töffarar! Ég vissi alveg að þetta væru töffarar en þeir sprengdu hreinlega skalann hjá mér og settu nýja merkingu í orðið! Það að ná að sameina auðmýktina, sjálfstraustið, fókusinn, viljann, geðveikina o.fl. innan um alla þessa athygli og læti er eitthvað sem er magnað og sérstaklega í ljósi þess að þetta er þeirra fyrsta stórmót.

Logi Bergmann Eiðsson, fjölmiðlamaður
Já. Jafnvel þó að við séum alltaf minna með boltann og verjumst miklu meira, þá held ég að við höfum átt fleiri dauðafæri í öllum leikjunum. Hin liðin hafa vissulega fengið færi en fæst hafa þau verið, það sem maður gæti kallað, dauðafæri. Svo hefur komið mér á óvart hvað strákarnir eru rólegir og á jörðinni. Frábær blanda af hógværð og sjálfstrausti.

Sjá einnig:
Tíu álitsgjafar velja þrjá bestu menn Íslands