Þýski markahrókurinn, Mario Gomez, mun að öllum líkindum ganga í raðir tyrkneska liðsins Besiktas á allra næstu misserum.
Tyrkneska félagið hefur náð samkomulagi við Fiorentina um kaup á kappanum en samkvæmt ítölskum miðlum er kaupverðið í kringum 8 milljónir evra.
Gomez mun halda til Tyrklands á morgun og gangast undir læknisskoðun hjá Besiktas. Honum er ætlað að fylla skarð Demba Ba sem yfirgaf Besiktas fyrir Shanghai Shenhua en Ba skoraði 18 mörk í tyrknesku deildinni á síðustu leiktíð.
Fiorentina keypti Gomez frá Bayern Munchen fyrir tveim árum síðan og borgaði 20 milljónir evra fyrir en Þjóðverjinn hefur ekki náð sér á strik á Ítalíu þar sem meiðsli hafa sett strik í reikninginn.
Fari svo að Gomez gangi í raðir Besiktas verður hann önnur stórstjarnan sem fer til Besiktas á skömmum tíma en Portúgalinn Ricardo Quaresma gerði nýverið samning við félagið.
Athugasemdir