Roy Hodgson, landsliðsþjálfari Englands, hefur verðlaunað þá Jonjo Shelvey og Jamie Vardy fyrir góða byrjun á tímabilinu með sæti í landsliðshópnum sem mætir San Marínó og Sviss í undankeppni EM 2016.

Shelvey hefur verið lykilmaður á miðju Swansea og Vardy hefur farið vel af stað í framlínu Leicester. Shelvey á einn landsleik að baki en það var einmitt gegn San Marínó árið 2012.

Vardy hefur skorað tvö mörk í fjórum leikjum það sem af er tímabilinu hjá Leicester.

Meðal þeirra sem sitja hjá vegna meiðsla eru Jordan Henderson, Jack Wilshere og Danny Welbeck.