Það kom mörgum í opna skjöldu þegar þær fréttir bárust úr herbúðum Arsenal í gær að Jack Wilshere væri frjálst að yfirgefa félagið.
Wilshere hefur mátt gera sér að góðu að eyða löngum stundum á varamannabekknum og er Arsene Wenger nú tilbúinn að leyfa honum að fara á láni til að fá meiri spilatíma.
Enskir fjölmiðlar útiloka að Wilshere verði lánaður til liða sem gætu verið í samkeppni við Arsenal í efri hluta deildarinnar en talið er að nágrannaliðin Crystal Palace og West Ham hafi mikinn áhuga á miðjumanninum.
Þá er ekki útilokað að Valencia reyni aftur við Wilshere en spænska liðið reyndi að kaupa kappann í janúar síðastliðnum. Þá var reyndar Englendingurinn Gary Neville við stjórnvölin á Mestalla.
Ítalíumeistarar Juventus eru einnig sagðir hafa áhuga á Wilshere en ljóst er að hann þarf að hafa hraðar hendur við val á nýju félagi þar sem félagaskiptaglugginn lokar á morgun.
Athugasemdir