Ólafur Brynjólfsson þjálfari Vals var að vonum ánægður eftir sigurleikinn gegn Breiðablik í lokaumferð Pepsi-deildarinnar. Honum fannst leikskipulag Vals ganga upp og segist sáttur við sumarið.
Lestu um leikinn: Valur 1 - 0 Breiðablik
„Ég gríðarlega ánægður með það sem við höfum gert í sumar. Við erum með 39 stig. Jafnmörg stig og Íslandsmeistararnir frá því í fyrra í 2. sæti. Það er ekki spurning að það er hægt að byggja ofan á þetta.“
En hvernig fannst Ólafi leikurinn?
„Hann spilaðist bara eins og við vildum. Við lágum bara niðri. Vorum ekki að spila fallegan fótbolta í dag og ætluðum ekkert að gera það. Ætluðum bara að halda okkar marki hreinu og það gekk eftir.“
„Við byrjuðum mjög hressilega og ég held að það hafi komið þeim á óvart hvernig við spiluðum. Við lokuðum á þær í öllum svæðum nánast og lokuðum vel á Hallberu og Fanndísi. Fyrsta liðið sem vinnur Breiðablik í tvö ár. Það er mjög gaman.“
Ólafur vonast til að vera áfram með liðið en hann mun funda með stjórninni fljótlega og fara yfir þau mál.
„Ég vil vera áfram með liðið en það er undir stjórn komið hvað gerist. Við munum örugglega setjast niður bráðlega og fara yfir árangur liðsins og svo framvegis,“ sagði Ólafur meðal annars en hægt er að horfa á allt viðtalið við hann í sjónvarpinu hér að ofan.
Athugasemdir