Heimild: Vísir.is
Rasmus Christiansen er fyrrum leikmaður ÍBV.
„Hann er einn af nokkrum sem við erum að skoða. Þetta mál er bara í athugun. Meira get ég ekki sagt um þetta á þessari stundu,“ sagði Bjarni Guðjónsson, nýráðinn þjálfari KR, þegar Vísir.is spurði út í áhuga á Rasmus Christiansen.
Danski miðvörðurinn hefur verið orðaður við KR en hann lék með ÍBV frá 2010-2012 og var einn besti varnarmaður Pepsi-deildarinnar.
Síðustu tvö ár hefur hann leikið með Ull/Kisa í norsku B-deildinni en hann fór í aðgerð eftir krossbandaslit í sumar. Hann hefur ekki útilokað það í viðtölum við fjölmiðla að snúa aftur í íslenska boltann.
Bjarni var kynntur sem þjálfari KR í vikunni en hann er ásamt aðstoðarmönnum sínum að fara yfir leikmannamálin þessa dagana.
Grétar Sigfinnur Sigurðarson er samningslaus en KR-ingar vonast til að halda honum innan sinna raða. „Mig grunar að Grétar sé að nálgast samkomulag og vonandi verður hann áfram með okkur," sagði Bjarni í vikunni.
Athugasemdir
