„Þetta er hugmynd sem örugglega fleiri hafa fengið en við ákváðum að bomba okkur í þetta," segir Björn Bragi Arnarsson sem hefur gefið út bókina „Áfram Ísland" en þar er fjallað um leið íslenska landsliðiðsins í lokakeppni EM og fjallað um strákana í liðinu.
Bókin hefur fengið ansi góð viðbrögð og er komin í allar helstu bókabúðir en Björn Bragi var í viðtali í útvarpsþættinum Fótbolti.net á X-inu síðasta laugardag.
„Við vildum gera þetta „djúsí" og eigulegt, góða heimild um þetta geggjaða afrek. Við erum sjálfir rosalega ánægðir með útkomuna og maður setur nafnið sitt stoltur við þetta," segir Björn Bragi.
Bókin er stútfull af skemmtilegum viðtölum, áhugaverðum upplýsingum og síðast en ekki síst eru glæsilegar ljósmyndir Hafliða Breiðfjörð að njóta sín gríðarlega vel. Þar má meðal annars finna magnaða mynd af Gylfa Sigurðssyni sem tekin var í Lettlandi þar sem hann er umkringdur andstæðingum.
„Þetta er ein flottasta fótboltamynd sem ég hef séð og minnir mann á fræga mynd af Maradona á móti Belgíu. Þarna ertu með á mynd fimm menn sem eru á Gylfa," segir Björn Bragi.
Viðtalið má heyra í heild sinni í spilaranum hér að ofan en þar er einnig rætt um enska boltann en Björn Bragi er stuðningsmaður Tottenham.
Sjá einnig:
Upptaka - Hlustaðu á útvarpsþáttinn í heild sinni
Athugasemdir