„Það er skemmtilegt að koma hingað og fara að æfa," sagði Arnór Ingvi Traustason kantmaður Íslands við Fótbolta.net í Osló í gær en þar æfði íslenska landsliðið fyrir vináttuleik við Noreg á morgun. Það hefur verið nóg að gera hjá honum með félagsliði sínu í Svíþjóð en nú tekur landsliðið við.
„Seinustu vikur hafa verið annasamar en það er fínt að vera kominn hingað og geta bara hugsað um þetta," sagði hann.
„Við vitum eitthvað um norska liðið en svo eigum við eftir að fara betur yfir það. Við þurfum að fara yfir nokkra hluti sem við viljum fara yfir og það skiptir höfuðmáli, að vera eins vel undirbúinn og þú getur fyrir fyrsta leik á EM."
Arnór Ingvi var spurður út í mikilvægi þess að ná í sigra í síðustu æfingaleikjunum fyrir EM, núna gegn Noregi á morgun og Liechtenstein heima á mánudaginn.
„Ég held að það skipti meira máli að við náum þessu rétt sem við viljum gera rétt, og mikilvægt að fá það í gang og inn í kerfið hjá okkur sem við viljum bæta okkur í. Það skiptir höfuðmáli en auðvitað vill maður alltaf vinna hvern einasta fótboltaleik."
Arnór Ingvi samdi á dögunum við Rapid Vín í Austurríki og fer þangað eftir EM.
„Það eru spennandi og krefjandi tímar framundan eftir EM en þetta verður bara skemmtilegt. Þetta er stórt og flott lið, borgin er mjög fín og með mikla sögu. Þetta er mjög spennandi."
Athugasemdir