Aron Einar Gunnarsson, fyrirliði Ísland, býst við að vera klár í slaginn þegar leikið verður gegn Hollandi á fimmtudag. Aron hefur verið að glíma við meiðsli en Fótbolti.net ræddi við hann í dag eftir fyrstu æfingu íslenska liðsins í Amsterdam.
„Ég komst heill í gegnum æfinguna og mér líður bara vel. Ég var ekki alveg 100 í tempói og reyni betur á þetta á morgun. Þetta var fyrsta æfingin mín síðan síðasta þriðjudag. Ég er að glíma við vöðvameiðsli hér og þetta er óþarfa bögg. Ég hata svona bögg," segir Aron.
„Við erum komnir hérna til að taka 100% á Hollendingum. Fólk er að borga fúlgu fjár til að styðja við bakið á okkur og við ætlum að gera okkar besta. Við gerum okkur alveg grein fyrir því að við erum að fara að mæta einni sterkustu fótboltaþjóð í heimi og með frábæra leikmenn innanborðs. Ef við mætum þeim skipulagðir er ég ekker smeykur við þetta."
„Það er gífurleg pressa á þeim, þeir verða í rauninni að vinna en við komum inn í þennan leik hugsandi það líka að við verðum að vinna."
Ljóst er að Emil Hallfreðsson verður ekki með gegn Hollandi.
„Það er vont að missa Emil út úr þessu. Hann hefur verið frábær síðustu tvö tímabil á Ítalíu. Við erum í raun ein stór fjölskylda og það er leiðinlegt að missa hann út," segir Aron.
Viðtalið má sjá í heild í sjónvarpinu hér að ofan en þar fer Aron meðal annars út í spá sína fyrir umferðina i Pepsi-deild karla í gær.
Athugasemdir