„Við áætlum að ljúka endurgerð vallarins í september," sagði Magnús Gunnarsson framkvæmdastjóri Hauka við Fótbolta.net.

„Það var auðvitað orðið löngu tímabært að skipta því gamla út fyrir nýtt, en álagið á völlinn hefur verið gríðarlegt á umliðnum árum. Mesta furða hvað það hefur enst, var lagt á árið 2005."

Haukar eiga einn heimaleik eftir í 1. deild karla, gegn BÍ/Bolungarvík þann 12. september.

Ekki verður hægt að spila þann leik á Ásvöllum en það skýrist í vikunni hvar sá leikur fer fram.