„Þetta var frábært. Skemmtilegasti leikur sem ég hef spilað held ég,” sagði markaskorarinn Laufey Björnsdóttir í viðtali við Fótbolta.net skömmu eftir að hún hafði tryggt liði sínu sigur með glæsilegu marki á lokamínútunni gegn toppliði Stjörnunnar.
Lestu um leikinn: Valur 2 - 1 Stjarnan
„Það var bæði erfitt og mjög gaman, allt í bland. Við ætluðum að vinna þær í baráttunni. Við erum með gott fótboltalið og ef við vinnum baráttuna þá erum við vel staddar. Við ætluðum að reyna að vera þéttar og láta boltann ganga vel. Mér fannst við vera yfir í baráttunni. Við vorum allar sem ein að berjast eins og ljón.”
Það var mikil dramatík á lokamínútum leiksins og við spurðum Laufey hvað hafi farið í gegnum huga hennar þegar Pála Marie, liðsfélagi hennar, fékk að líta rauða spjaldið í lok leiks.
„Ég hugsaði bara að við ætlum að vinna þetta. Það kom einhver extra orka í okkur allar þegar það gerðist,” sagði Laufey og sagðist hafa hugsað það sama í mótlætinu þegar Margrét Lára misnotaði vítaspyrnu.
Mótlætið efldi Valsliðið bara og Laufey sagðist viss um að geta skorað þegar hún fékk boltann í skotfæri utan teigs. Hún svoleiðis smellhitti boltann og tryggði Val 2-1 sigurinn með draumamarki.
„Ég vil ekki meina að ég hafi verið hetjan. Við stóðum okkur allar ógeðslega vel og það var bara ótrúlega gaman að ég skuli hafa skorað”
Þessi úrslit hleypa lífi í toppbaráttuna og Valsarar færa sig nær toppsætinu.
„Auðvitað eigum við séns. Við gerðum okkur aðeins auðveldara fyrir í sénsinum með því að taka þrjú stig hér þannig að við höldum bara áfram að berjast,” sagði Laufey bjartsýn að lokum.
Athugasemdir