„Þetta var háspennuleikur, eins og hefur verið á móti Stjörnunni í sumar,” sagði markvörðurinn Sandra Sigurðardóttir eftir dramatískan 2-1 sigur á Stjörnunni.
Lestu um leikinn: Valur 2 - 1 Stjarnan
„Mér fannst þetta bara gaman. Ég naut mín vel og þetta var örugglega skemmtilegur leikur að horfa á. Bara gaman sko.”
„Við ætluðum að halda áfram að bæta þá fínu spilamennsku sem hefur verið hjá okkur í sumar. Þetta hefur verið smá kaflaskipt á tímum en við vildum bara mæta snælduvitlausar eins og við reynum að gera hvern einasta leik og við ætluðum að reyna að taka þrjú stig og það á heimavelli þannig að það tókst.”
Margir vildu meina að Valur hefði kvatt toppbaráttuna eftir að hafa tapað gegn ÍBV í þarsíðustu umferð en með sigrinum í kvöld komast Valsarar aftur á sporið.
„Við ætlum auðvitað bara að reyna að ná í þau stig sem eru eftir í pottinum og sjá hverju það skilar okkur. Hvort sem það skilar okkur eitthvað ofar eða ekki. Það verður bara að koma í ljós.”
Sandra átti virkilega góðan leik í kvöld og það gegn sínum gömlu félögum. Aðspurð um það hvort að það hafi verið extra sætt að vinna gamla liðið sitt sagði Sandra að aðalatriðið væri að ná sigri en auðvitað væri gaman að vinna toppliðið.
„Það er bara alltaf gott að vinna. Auðvitað er gott að vinna á móti Stjörnunni sem er toppliðið í dag þannig að jú, auðvitað er það geggjað, en eins og hver annar sigur í rauninni.”
„Ég er sátt útaf því að við vinnum en hefði nú viljað gera betur í markinu. Það er bara eins og það er."
Athugasemdir