Saga landsleikjamenningarinnar
Fyrsti skráði landsleikur heimsins er frá 1872 og var sá leikur í Glasgow, Skotlandi. Þar mættu Skotar nágrönnum sínum frá Englandi. Á þessum tíma var knattspyrna ekki spiluð utan Bretlandseyja en við aldamótin 28 árum síðar var knattspyrna spiluð m.a. í Frakklandi, Ítalíu og Þýskalandi.

Fyrsta landsliðsmótið var haldið 1884 í Bretlandi þar sem fjögur lönd Bretlandseyja mættust, eða Skotland, England, Wales og Norður-Írland (sem var sameinað Írlandi á þeim tíma)

Knattspyrna var spiluð á Ólympíuleikunum frá 1900 en engin verðlaun hlutust og var íþróttin einungis talin vera skemmtiatriði en ekki keppnishæf. Knattspyrnusamtökin FIFA voru stofnuð árið 1904 með það sem meginmarkmið að halda landsliðsmót. 1906 í Sviss átti að vera fyrsta knattspyrnumótið utan Ólympíuleikanna en það heppnaðist herfilega.

Næstu ár þróaðist knattspyrnan mjög mikið og var hún talin keppnisíþrótt á Ólympíuleikunum. Lönd frá öðrum heimsálfum fóru að taka þátt, til dæmis Egyptaland og Úrúgvæ, en Úrúgvæ vann knattspyrnuviðburð Ólmypíuleikanna 1924 og 1928.

Saga Heimsmeistaramótanna
Vegna velgengni Úrúgvæ á leikunum var ákveðið að halda fyrstu Heimsmeistarakeppnina árið 1930 í Úrúgvæ. Það tóku aðeins þrettán lið þátt vegna of mikils ferðakostnaðar til Suður-Ameríku. Belgía, Frakkland, Júgóslavía og Rúmenía tóku þátt fyrir hönd Evrópu, en einnig voru tvö lið frá Norður-Ameríku og hin sjö liðin voru öll frá Suður-Ameríku. 93,000 manns horfðu á úrslitaleikinn milli Úrúgvæ og Argentínu, sem Úrúgvæ vann 4-2.

1934 og 1938 var heimsmeistaramótið haldið í Evrópu, fyrst í Ítalíu svo Frakklandi, en ítalska landsliðið vann bæði mótin. Það voru nánast eingöngu lönd frá Evrópu sem tóku þátt vegna fátæktar landa utan álfunnar, en Brasilía var eina liðið frá annarri álfu til að taka þátt í þeim báðum. 1942 og 1946 var ekkert mót haldið vegna Síðari Heimsstyrjaldarinnar.

1950 tók Úrúgvæ aftur þátt vegna þess að mótið var haldið í Brasilíu. Það var eina mótið þar sem enginn opinber úrslitaleikur var spilaður vegna þess að fjögur efstu liðin fóru saman í lokariðil þar sem öll liðin kepptu við hvort annað, en Úrúgvæ endaði í 1. sæti þökk sé 2-1 sigri á Brasilíu sem endaði í 2. sæti.

1954 vann Vestur-Þýskaland en Brasilía vann þrjú af næstu fjórum mótum frá 1958 til 1970. Þetta eina mót sem Brasilía sigraði ekki var eina Heimsmeistaramótið sem Englendingar hafa nokkurn tímann sigrað, þrátt fyrir að vera upphafsmenn knattspyrnunnar.

Frá 1934 til 1978 tóku 16 lið þátt í hverju móti, fyrir utan 1938 og 1950 þar sem nokkur lið hættu við það að mæta. 1982 var ákveðið að fjölga liðum í 24 en það var ekki fyrr en 1998 sem liðin urðu 32 á hverju móti.

Einungis lið frá Evrópu og Suður-Ameríku hafa unnið mótið, en lengst af liðum utan heimsálfanna tveggja hafa Bandaríkjamenn náð alla leið í undanúrslitin en það gerðu einnig Suður-Kóreu menn árið 2002, þegar þeir lögðu m.a. Ítalíu og Spán af velli eftir mjög umdeilda dómgæslu í sínu heimalandi.

Í allt hafa 76 lönd keppt á HM, en einungis 7 þeirra hafa unnið Heimsmeistaramótið. Brasilía hefur unnið það fimm sinnum, Ítalía fjórum sinnum, Þýskaland þrisvar, Argentína og Úrúgvæ tvisvar en Frakkland og England einu sinni. Öll þessi lönd fyrir utan Brasilíu unnu mótið einu sinni í sínu heimalandi og Brasilía er einnig eina landið sem hefur tekið þátt í öllum mótunum frá upphafi.

Heimsmeistaramótið 2006 var sýnt af 376 stöðvum um allan heim í 214 löndum og ríkjum. Ef allir leikir sem allar þessar stöðvar sýndu yrðu sýndir á einni stöð myndi það taka yfir átta ár.