Christian Mouritsen og Daniele de Rossi.
Valur hefur samið við færeyska framherjann Christian Mouritsen en hann kemur til félagsins frá B36 í heimalandinu.
Mouritsen var á reynslu hjá Val á dögunum og hann gerði tveggja ára samning við félagið áður en hann hélt aftur heim til Færeyja í síðustu viku.
Mouritsen á að baki sex landsleiki fyrir Færeyjar en fyrsti landsleikur hans var á móti Íslandi í Kórnum.
Auk þess að vera framherji þá getur Mouritsen leikið framarlega á miðjunni en hann var meðal annars í unglingaliði Manchester City tímabilið 2007-2008.
Mouritsen er þriðji Færeyingurinn sem Valsmenn fá síðan Kristján Guðmundsson tók við liðinu í haust en áður höfðu Jónas Þór Næs og Pól Jóhannus Justinussen samið við félagið.
