Í síðustu viku æfðu Kristófer Orri Pétursson og Kristófer Scheving, leikmenn Gróttu, og Viktor Marel Kjærnested, leikmaður Aftureldingar, með unglingaliðum Brommapojkarna IF í Stokkhólmi.
Með í för voru Magnús Örn Helgason og Bjarki Már Ólafsson þjálfarar hjá Gróttu sem kynntu sér þjálfunaraðferðir og hugmyndafræði félagsins og fylgdust með æfingum.
Kristófer Scheving og Viktor Marel æðfðu með U-17 ára liðinu en þeir eru fæddir árin 1999 og 2000. Kristófer Orri, sem er fæddur árið 1998, æfði hins vegar með U-19 ára liðinu sem á góða möguleika á að komast í undanúrslit sænsku 19 ára keppninnar þriðja árið í röð. Í
Akademía Brommapojkarna hefur fimm ár í röð verið valin besta fótboltaakademía Svíþjóðar en félagið er frægt fyrir að framleiða framúrskarandi knattspyrnumenn. Sem dæmi hafa á síðustu misserum leikmenn úr U-19 ára liðinu verið seldir til stórliða á borð við Chelsea, Bayern Munchen og Sunderland.
Þorlákur Árnason er yfirmaður akademíunnar en hann tók við því starfi fyrir tæpu ári. Áður þjálfaði Þorlákur U-17 ára landslið karla og meistaraflokk kvenna hjá Stjörnunni. Þá er Ísfirðingurinn Magni Fannberg þjálfari aðalliðs Brommapojkarna en áður hafði Magni getið sér gott orð sem þjálfari unglingaliða félagsins.
Athugasemdir