Hilmar er sóknarmiðjumaður fæddur 1992 sem hefur allan sinn feril leikið fyrir Leiknismenn. Hann var valinn besti leikmaður 1. deildarinnar þegar Breiðhyltingar unnu sér sæti í Pepsi-deildinni.

Í sumar var Hilmar allt í öllu í sóknarleik Leiknismanna, en hann lagði upp samtals 8 mörk og skoraði 4, en þess má geta að einungis Kristinn Jónsson átti fleiri stoðsendingar í deildinni. Þá var Hilmar valinn í lið ársins í Pepsi-deildinni í Morgunblaðinu.

Samkvæmt heimildum Fótbolta.net voru mörg lið í deildinni sem höfðu áhuga á Hilmari, sem var samningslaus, en á endanum valdi hann að ganga í raðir Stjörnunnar.

Hilmar er annar leikmaðurinn sem Stjarnan fær til sín frá því tímabilinu lauk en varnarmaðurinn Grétar Sigfinnur Sigurðarson gekk í raðir liðsins í síðustu viku frá KR.