ÍA rúllaði Stjörnunni upp er liðin mættust í bronsleik Fótbolta.net mótsins á Samsung vellinum í Garðabæ. Mikill kuldi var í leiknum enda spilaður utandyra.

Jeppe Hansen kom heimamönnum yfir í fyrri hálfleik en Hallur Flosason var búinn að jafna tveimur mínútum síðar með þrumuskoti í kjölfarið á hornspyrnu.

Arnar Már Guðjónsson kom gestunum yfir undir lok fyrri hálfleiks og Steinar Þorsteinsson, sem er á 19. aldursári, tvöfaldaði forystuna og voru Skagamenn 3-1 yfir í hálfleik.

Stjörnumenn fengu talsvert af færum í fyrri hálfleik en Skagamenn nýttu sín færi mun betur.

Arnar Már kom Skagamönnum í 4-1 áður en Steinar bætti fimmta og sjötta marki Skagamanna við og niðurstaðan 6-1 sigur ÍA.