Fótbolti.net

mið 22. desember 2004 09:00

Elvar Geir Magnússon

Pavel Nedved - Juventus (3)

Við hér á Fótbolta.net stóðum fyrir kosningu á besta fótboltamanni heims í nóvembermánuði. Við höfum nú í desember verið að telja niður til jóla með því að birta þá 24 efstu, einn á dag.

3. Pavel Nedved

Pavel Nedved fæddist í bænum Cheb sem staðsettur er í nágrenni Prag í Tékklandi. Hann kom í heiminn 30.ágúst árið 1972. Faðir hans heitir Vaclav og starfar sem verkamaður, hann eyddi miklum tíma í að æfa skot með syni sínum. Móðir Pavel heitir Ana Nedved. Foreldrar hans voru mjög stolt af ljóshærða stráknum sínum sem ólst upp sem mjög sjálfstæður persónuleiki með mikla trú á eigin verðleikum.

Nedved er álitinn guð í heimabæ sínum Cheb og er elskaður og dáður af fyrrum félagi sínu, Sparta Prag. Hann hóf fótboltaferilinn með Dukla Prag og fór þaðan til Spörtu í Prag. Þaðan fór hann í ítölsku Seríu-A deildina en fyrir tímabilið 1996/97 gekk hann til liðs við Lazio. Framan af ferlinum lék hann sem sóknarmaður en færðist alltaf nær miðvæðinu og í dag leikur hann best í hjarta miðjunnar.

Þegar Evrópumeistaramótið fór fram í Englandi árið 1997 var slegist um Nedved og fóru Lazio og PSV Eindhoven þar fremst í flokki. Eins og áður sagði sigraði Lazio þann slag. Hans fyrsti leikur fyrir félagið var gegn Bologna þann 7.september 1996 en það var reyndar Bologna sem sigraði í þeim leik 1-0.

Nedved skoraði mikið fyrir Lazio, ellefu mörk á fyrsta tímabili sínu. Á hans öðru tímabili kom fyrsti titill hans hjá félaginu þegar Lazio varð ítalskur bikarmeistari og sigraði síðan Ofurbikarinn þar í landi. Þriðja tímabil hans var ekki eins og best verður á kosið en í maí 1999 varð Lazio Evrópumeistari bikarhafa en í úrslitaleiknum skoraði Nedved.

Hann var lykilmaður í liðinu 1999/2000 þegar það tryggði sér ítalska meistaratitilinn. Hann var elskaður af stuðningsmönnum Lazio. Skiljanlega voru mörg félög sem vildu hafa Nedved í sínum herbúðum og hann neitaði fjölmörgum tilboðum, þ.á.m. frá Atletico Madrid og Manchester United. Nedved sagðist vilja vinna Meistaradeildina með Lazio áður en hann færi frá liðinu.

Því takmarki náði Nedved ekki og í júlí 2001 var hann seldur til Juventus. Hann smellpassaði inn í lið Juve og vann tvo ítalska meistaratitla á tveimur árum með liðinu. Hann var besti leikmaður liðsins tímabilið 2002/03 þegar það komst í úrslitaleik Meistaradeildarinnar. Hann gat þó ekki leikið með í sjálfum úrslitaleiknum þar sem hann tók út leikbann, það voru gríðarleg vonbrigði en AC Milan sigraði í leiknum.

Nedved hleypur í 90 mínútur og er jafnvígur á báðar lappir, hann var árið 2003 valinn knattspyrnumaður ársins í fjórða sinn í Tékklandi. Stuttu síðar þá fékk hann gullknöttinn 2003 sem besti knattspyrnumaður Evrópu sem er einn af hápunktunum á ferli hans. Þá var hann að sjálfsögðu valinn bestur í ítalska boltanum.

Tékkland komst í undanúrslit í Evrópukeppni landsliða sumarið 2004 þar sem Nedved var besti maður leiksins gegn Hollendingum í riðlakeppninni. Tékkland vann leikinn 3-2 mjög eftirminnilega. Eftir mótið tilkynnti hann að hann væri hættur að leika með landsliðinu sem var mikið áfall fyrir Tékkland, þá hefur hann sagst íhuga að hætta fótboltaiðkun alfarið 2006.

Vissir þú þetta um Nedved:
- Honum finnst best að skjóta með vinstri.
- Umboðsmaður hans heitir Raiola.
- Þegar hann var yngri lærði hann að vera endurskoðandi.
- Hann kynntist Ivönu eiginkonu sinni þegar hann var 16 ára og þau giftust fimm árum síðar.
- Hann á tvö börn, dóttir sem heitir Ivana og son sem heitir Pavel eins og hann.
- Hann á eldri systur.
- Hann safnar víni og borðar mikinn mozzarella.
- Fyrirmyndin hans er hnefaleikakappinn Mike Tyson.
- Hann spilar oft tennis.
- Uppáhaldsmyndin hans er Braveheart.
- Uppáhalds leikarar hans eru Julia Roberts og Mel Gibson.

Sjá einnig: