Króatía og Nígería eru með okkur Íslendingum í riðli á HM í Rússlandi í sumar, rétt eins og Argentína. Þessi lið mætast í fyrstu umferð á meðan Ísland leikur gegn Argentínu.

Króatar eru með hörkugott lið, eins og Íslendingar kannast við. Helstu stjörnur liðsins spila á miðjunni, Luka Modric og Ivan Rakitic, tveir af bestu miðjumönnum í heimi.

Nígería hefur líka góða leikmenn í sínum röðum og er líklega þekktasta nafnið í þeirra liði John Obi Mikel, fyrrum miðjumaður Chelsea og núverandi miðjumaður Tianjin Teda í Kína.

Samson Siasia, fyrrum landsliðsþjálfari Nígeríu, er á þeirri skoðun að Obi Mikel sé á svipuðum kalíber og stjörnunar í liði Króata.

„Mikel er í sama gæðaflokki og Modric og Rakitic, jafnvel þó Modric spili með Real Madrid," sagði Siasia við Goal.com.