„Já við FH-ingar óskuðum fyrst liða að fresta leik okkar í dag sökum veðurs, það hefur ekki enn verið hægt að taka ákvörðun hvað skuli gera þar sem KA menn vilja spila leikinn. Á meðan bíðum við eftir því að veðrið versnar og ákvörðun verði tekin með framhaldið," segir Birgir Jóhannsson, framkvæmdastjóri FH.

Leikmannahópur KA er mættur í bæinn en hann kom með flugi.

Sævar Pétursson, framkvæmdastjóri KA, segir að Akureyringar vilji spila leikinn enda yrði það mikill aukakostnaður fyrir félagið ef honum yrði frestað.

„Við vorum búnir að bóka flug með góðum fyrirvara. Við athuguðum hvort við myndum fá nýtt flug á morgun samkvæmt ÍSÍ flugfargjaldi en það var ekki hægt. Við erum einfaldlega ekki tilbúnir að taka á okkur tvöfaldan kostnað," segir Sævar.

„Það er spáð góðu Vestmannaeyjaveðri. Það hafa áður farið fram leikir í 15 metrum á sekúndu hér á landi."

Eins og staðan er núna er leikurinn því á hefðbundnum tíma klukkan 18 í Kaplakrika en hinum tveimur leikjum deildarinnar sem áttu að vera utandyra í kvöld hefur verið frestað til morguns.

Í kvöld fimmtudag:
18:00 FH - KA
18:00 Fylkir - ÍBV

Á morgun föstudag:
19:15 Keflavík - Fjölnir
19:15 KR - Breiðablik
19:15 Valur - Stjarnan
19:15 Víkingur - Grindavík