Landsliðið flýgur til Moskvu í dag þar sem liðið leikur gegn Argentínu á laugardaginn. Fyrsti leikur Íslands á HM í sögunni.

„Við erum með leikherbergi, síðan vorum við að fá hjól, síðan er hægt að fara í sund, körfubolta, tennis og blak. Það er því nóg að gera. Ég sjálfur skellti mér í hjólatúr í gær, við skoðuðum bæinn aðeins og settumst niður og fengum okkur kaffi og aðeins að soga í okkur menninguna," sagði Arnór Ingvi, en hvernig smakkaðist kaffið?

„Kaffið var ágætt. Það var sterkt en ágætt. Ég bætti smá mjólk við."

Íslenska liðið hefur undirbúið sig vel fyrir leikinn á laugardaginn. Arnór segir að það séu veikleikar til staðar í argentíska liðinu, þó þeir séu fáir.

„Veikleikarnir eru þeir að við getum nýtt okkur mikið af því sem þeir taka áhættur í. Við erum þolinmóðari en þeir. Ég ætla ekki að gefa alltof mikið upp en það eru klárir veikleikar sem við viljum nýta okkur."

Í vináttulandsleikjunum tveimur fyrir mótið fékk Arnór fáar mínútur til að sýna sig og sanna.

„Það er alltaf hægt að segja að við hafi viljað og ekki viljað. Ég er hér og ég er ánægður með það og er ánægður að vera partur af hópnum. Maður getur ekkert klagað núna."

„Ég vill alltaf spila og maður vill alltaf setja mark sitt á leikinn. Ef ég fæ mínar mínútur, þá mun ég nýta þær til hins ítrasta."

Viðtalið við Arnór Ingva má sjá í sjónvarpinu hér að ofan.