Stjarnan heimsótti KA menn á Akureyrarvöll í kvöld og unnu sterkan 2-1 sigur í miklum baráttuleik. Ævar Ingi leikmaður Stjörnunnar spilaði með KA upp alla yngri flokka og sagði mjög sterkt að vinna á svona erfiðum útivelli.
Lestu um leikinn: KA 1 - 2 Stjarnan
„Frábært að taka þrjú stig, þetta er líklegast erfiðasti útivöllur á landinu þannig að þetta eru mjög mikilvæg þrjú stig í baráttunni."
Ævar var meiddur eiginlega alla síðustu leiktíð og fékk þungt höfuðhögg í upphafi móts í ár. Ævar var gífurlega ánægður að byrja í dag eftir langa fjarveru úr byrjunarliði í Pepsí-deildinni.
„Þetta er fyrsti byrjunarliðsleikurinn minn í eitt og hálft ár þar sem ég var meiddur allt síðasta tímabil svo það er mjög ánægjulegt að vera kominn af stað aftur."
Stjarnan byrjaði mótið illa en hafa verið mjög öflugir seinni hluta móts, Ævar sagði að erfitt væri að stoppa þá eins og þeir spila í dag.
„Það virðist ekkert lið geta stoppað okkur þegar við erum í þessum ham en þetta var hörkuleikur og þetta datt okkar megin í dag."
Athugasemdir