Lopetegui var í dag kynntur sem nýr þjálfari Real Madrid og svaraði hann nokkrum spurningum í leiðinni.

„Í gær var sorglegasti dagur lífs míns frá því móðir mín lést. Í dag er hins vegar besti dagur lífs míns," sagði hinn 51 árs gamli Lopetegui.

„Ég veit hvaða félag þetta er, kröfurnar eru miklar. Í dag er besti dagur lífs míns," sagði Lopetegui en hann spilaði einn leik fyrir aðallið félagsins á leikmannaferlinum. Hann var markvörður. „Ég kom hingað 18 ára með bróður mínum. Ég fór að heiman fyrir Real Madrid."

Lopetegui átti erfitt með að ráða tilfinningar sínar er hann var kynntur hjá Madrídarstórveldinu og felldi nokkur tár.

Perez ósáttur með spænska knattspyrnusambandið
Florentino Perez, forseti Real Madrid, skilur ekki í spænska kanttspyrnusambandinu að reka Lopetegui.

„Við náðum samkomulagi mjög fljótt, á nokkrum klukkustundum. Við vildum leggja fram tilkynningu til þess að forðast allar sögusagnir á meðan mótinu stendur," sagði Perez.

„Það er engin ástæða fyrir því að Julen Lopetegui eigi ekki að vera á bekknum hjá spænska landsliðinu á morgun."

Perez er á því að þetta sé enn ein leiðin til þess að reyna að „eyðileggja ímynd" Real Madrid.

Spánn mætir Portúgal á morgun í fyrsta leik sínum á HM. Leikurinn sem er mjög áhugaverður svona fyrir fram hefst klukkan 18:00 að íslenskum tíma.