Stjarnan mætti Nömme Kalju frá Eistlandi í 1. umferð forkeppni Evrópudeildarinnar í kvöld. Stjarnan byrjaði leikinn þokkalega og fékk vítaspyrnu strax á 18. mínútu eftir að markvörður Nömme Kalju tók Guðmund Stein niður en hann var sloppinn einn í gegn. Hilmar Árni steig á punktinn og skoraði.

Stjörnumenn héldu áfram að sækja og leikmenn Nömme Kalju voru í vandræðum með að finna glufur í vörn Garðbæinga. Í upphafi síðari hálfleiks komst liðið tveimur mörkum yfir. Hilmar Árni tók þá aukaspyrnu sem sigldi yfir pakkann og í netið. Boltinn fór mögulega af Baldri Sigurðssyni.

Guðjón Baldvinsson bætti svo við þriðja markinu og gerði út um leikinn á 70. mínútu. Stjörnumenn nýttu sínar skiptingar í framhaldinu og leikurinn fjaraði út en gestirnir áttu aðeins eitt skot á markið í leiknum. Stjarnan fer því með gríðarlega vænlega stöðu til Eistlands.