Segjast ekki ætla að bjóða í Brasilíumanninn
Real Madrid sendi á dögunum frá sér yfirlýsingu þar sem félagið blés á fréttir þess efnis að það væri búið að leggja fram tilboð í Neymar.
Í dag ákvað félagið að senda frá sér aðra yfirlýsingu vegna Neymar.
Cristiano Ronaldo var í vikunni seldur til Juventus fyrir 100 milljónir punda og hafa vaknað upp spurningar í kjölfarið hver Madrídarstórveldið muni kaupa í staðinn. Neymar hefur af flestum verið talinn arftaki Ronaldo hjá Real, en miðað við yfirlýsinguna sem Real var að senda frá sér virðist Brassinn ekki á leið aftur til Spánar.
„Real Madrid vill koma því á hreint að engin plön eru um tilboð í leikmanninn," sagði í yfirlýsingunni.
Hinn 26 ára gamli Neymar er fyrrum leikmaður Barcelona en hann var seldur þaðan í fyrrasumar, til Paris Saint-Germain fyrir ríflega 200 milljónir punda. Hann er dýrasti fótboltamaður sögunnar.
Kylian Mbappe, liðsfélagi Neymar hjá PSG, og Eden Hazard, leikmaður Chelsea, eru á meðal þeirra leikmanna sem einnig hafa verið orðaðir við Real Madrid.
Athugasemdir