Mikil fagnaðarlæti brutust út í Frakklandi en þau fóru gjörsamlega úr böndunum þegar leið á nóttina, þar sem verslanir voru rændar og fjöldaslagsmál brutust út þrátt fyrir gífurlega mikinn viðbúnað frönsku lögreglunnar.

Hátt í hundrað þúsund lögreglumenn vöktuðu götur Frakklands í gærkvöldi og voru tæplega 500 manns handteknir fyrir sinn þátt í óeirðunum.

Það eru minnst tveir látnir eftir nóttina og fleiri tugir særðir. Annar maðurinn, á fimmtugsaldri, hálsbrotnaði þegar hann hoppaði ofan í grunnt síki í fagnaðarlátunum. Hinn, á þrítugsaldri, keyrði á tré í fögnuðinum.

Átök brutust út víða um Frakkland og hefur lögreglan þar í landi verið gagnrýnd fyrir að bregðast við af of mikilli hörku.