Fjölnir og ÍBV skiptust á jafnan hlut þegar liðin mættust í Pepsi-deild karla í dag. Umdeilt atvik orsakaði jöfnunarmark ÍBV eins og bersýnilega kemur fram í textalýsingu á Fótbolta.net.

Fjölnismenn voru sterkari aðilinn til að byrja með og þeir náðu forystunni þegar lítið var eftir af fyrri hálfleiknum. Birnir Snær Ingason, Binni bolti, skoraði þá en hann hoppaði á frákast eftir skot frá vini sínum, Ægi Jarli Jónassyni.

Staðan var 1-0 fyrir Fjölni í hálfleik á Extra vellinum.

Mjög umdeildur dómur
Í seinni hálfleiknum sóttu bæði lið og reyndu að skora, ÍBV að reyna að jafna og Fjölnir að reyna að bæta við. En á 70. mínútu dró til tíðinda þegar Ívar Orri dómari dæmdi vítaspyrnu fyrir ÍBV við litla hrifningu Fjölnismanna.

Er dómnum lýst svona í textalýsingu á Fótbolta.net:

„Ég á ekki til eitt aukatekið orð! Ívar Orri dæmir víti þegar það er augljóslega brotið á Kaj Leó fyrir utan teig!" skrifaði Stefán Marteinn, okkar maður á vellinum, í beinni textalýsingu.

Reynsluboltinn Gunnar Heiðar Þorvaldsson steig á vítapunktinn og nýtti alla sína reynslu til að skora, 1-1.

Það voru ekki fleiri mörk skoruð í Grafarvogi og lokaniðurstaðan jafntefli.

Hvað þýða þessi úrslit?
ÍBV er í níunda sæti með 13 stig eins og Fjölnir sem er í tíunda sæti. Bæði lið eru áfram í fallbaráttu.